ყველა მიყვარს, ვინც ჩემს სიმღერას მოუსმინა" - რას ჰყვება 10 წლის გიორგი, რომელიც "კახური შაირების" სიმღერის შემდეგ მთელმა ქვეყანამ უცებ შეიყვარა?
10 წლის გიორგი კორკოტაშვილისვიდეომ, რომელიც ანსამბლ "შავნაბადას“ ბავშვთა გუნდთან ერთად "კახურ შაირებს“ ასრულებდა, სოციალური ქსელი მოიარა. სიმღერა სატელევიზიო ეთერში საღამოს გავიდა, ბიჭუნამ მეორე დილით უკვე ცნობილმა გაიღვიძა. აღფრთოვანებული კომენტარებით აავსეს პატარა სოლისტი, რომელიც გვეუბნება: "ყველა მირეკავდა და მილოცავდა. ამ ვიდეოს ამდენი გაზიარება თუ ექნებოდა, არ მეგონა... ხალხმა უცებ გამიცნო“...
ვინ არის არის გიორგი კორკოტაშვილი, როდის და როგორ დაინტერესდა ხალხური სიმღერით, ამაზე დედასთან ერთად თავად გვიამბობს.
ნინო ასპანაძე, გიორგი კორკოტაშვილის დედა:
- გიორგი თავიდანვე იყო სიმღერით გატაცებული, ხალხური სიმღერა მოსწონდა და ძალიან აინტერესებდა. ჰამლეტ გონაშვილზეა შეყვარებული. სულ პატარაობიდან მიაქცია ამ საოცარი მომღერლს ყურადღება. 6 წლისამ მისი ბიოგრაფია დეტალურად იცოდა. დაინტერესებული რომ იყო, ინტერნეტში და ისეც მასზე ინფორმაციას თვითონ იძიებდა...
ახლაც, ჰამლეტ გონაშვილის სიმღერა ტელეფონში აქვს და ძილის წინ იავნანასავით უსმენს. ყველაზე მეტად უხარია, რომ "შავნაბადაში“ ჰამლეტ გონაშვილის შვილიშვილებიც არიან. დე, იცი, ჰამლეტ გონაშვილის შვილიშვილები არიან ჩემთანო, - მითხრა - ამ ამბით აღტაცებული იყო.
- პატარა ასაკში სიმღერის ნიჭი რომ გამოავლინა, სიმღერაზე მიიყვანეთ?
- გურჯაანის რაიონის სოფელ კარდენახში ვცხოვრობდით და რადგან ასე იყო დაინტერესებული, გურჯაანის სიმღერის ჯგუფში, ბატონ ილია დათუაშვილთან მივიყვანე. მაშინ 7 წლის იყო. მასწავლებელს ძალიან მოეწონა და გიორგისაც მოეწონა იქაური გარემო - იქ ხალხური სიმღერით მეტად დაინტერესდა. მერე საცხოვრებელი ადგილი შევიცვალეთ, გადმოვედით რუსთავში, სადაც ვეძებდით, ვარკვევდით იმას, სიმღერაზე სად, ვისთან მიგვეყვანა. დავით ცინცაძის შესახებ რადგან ვიცოდით და გადავწყვიტეთ, მასთან მიგვეყვანა. თითქმის უკვე ერთი წელია, რაც "შავნაბადას“ ბავშვთა გუნდშია. ბატონმა დავითმა ჯერ მოსამზადებელ ჯგუფში ჩარიცხა, შემდეგ გამოცადა, მოეწონა და ბავშვთა გუნდში გადაიყვანა.
- გარდა იმისა, რომ მღერის არტისტულიც არის...
- კი და მისი სიმღერებიც, რასაც ასრულებს, სახასიათოა. ეს სიმღერაც, "კახური შაირები“ ბატონმა დავითმა კარგად მოარგო...
- ოჯახში ვინ მღერის კიდევ?
- მამაჩემს კარგი სმენა ჰონდა და მღეროდა, ოღონდ, თვითნასწავლი იყო, გიტარაზეც უკრავდა. ვფიქრობ, რომ მამაჩემისგან გამოჰყვა სიმღერის ნიჭიც და სიყვარულიც. სხვა არავინ მღეროდა და მღერის.
გიორგი კორკოტაშვილი:
- 6 წლის რომ ვიყავი, ცეკვაზე დავდიოდი, სახლში რომ დავბრუნდი, მამაჩემი და მეზობელი ქეიფობდნენ და ჰამლეტ გონაშვილის სიმღერა მომასმენინეს. ამ მომღერლის შესახებ საერთოდ არაფერი ვიცოდი. ნამღერმა შოკში ჩამაგდო. იმის მერე ვრთავდი "10 კახურ ნანას“, ვუსმენდი და ვიძინებდი. ჰამლეტ გონაშვილი ჩემთვის იმის საუკეთესო მაგალითია, გულით როგორ უნდა იმღერო. საოცარი მომღერალი იყო, იშვიათი ხმა ჰქონდა. მისი "სატრფიალო“ ყველაზე მეტად მომწონს. ზოგადად ხალხური სიმღერა ძალიან მომეწონა, მიმიზიდა. სხვადასხვა ხმა რომ მესმის, ეს თითქოს რაღაც დიდ ძალას მაძლევს.
"რანინაზე“ სოლოებს არჩევდნენ და მეც მოვინდომე ვიმღერებ რამეს-მეთქი. ვაკო ასათიანმა მითხრა, "ერთი ბოდბელი ბიჭი“ - ამას იმღერებო და გამიშვეს ონისე კახნიაშვილთან (სოლისტებს ასწავლის). თავიდან ტექსტი მეშლებოდა, მაგრამ ყველაფერს ნელ-ნელა ვამუშავებდი. ეს სიმღერა რომ გავაკეთე, დედას დაურეკეს და უთხრეს, რომ "რუსთავი 2“-ის პროექტში "გული მღერის“ გიორგი უნდა გამოვიდესო...
- როგორც ჩანს, "შავნაბადაში“ კარგი მასწავლებლები გყავს...
- კი, ვაკო ასათიანი კარგი ადამიანია, მხიარულია, ამიტომაც მიხარია "შავნაბადაში“ მისვლა. ძალიან კარგად და ყურადღებით ეკიდება ყველაფერს. ამუშავებს სიმღერებს და გვასწავლის, მერე დათო ცინცაძე ფორმებში სვამს ჩვენს ნამღერს... "შავნაბადა“ ჩემი პირველი სახლია. მინდა, რომ ბევრი სოლო ავითვისო და დავამუშაო.
