ავტოავარიას გურჯაანში სამი ადამიანის სიცოცხლე ემსხვერპლა, რომელთა შორის 2 არასრულწლოვანია.
უბედური შემთხვევა სოფელ მელაანში გვიან ღამით მოხდა.
ადგილობრივების თქმით, “ჰონდას” მარკის ავტომანქანა, რომელშიც 5 ადამიანი იმყოფებოდა ამობრუნდა და ცეცხლი გაუჩნდა. ცეცხლმოკიდებული ავტომანქანიდან გადმოსვლა შეძლო ორმა ადამიანმა, სამი კი დაიწვა. მათ შორის ერთი ბიჭი და ორი გოგო.
ადგილზე იმყოფებოდნენ სასწრაფო დახმარების, სამაშველო სამსახურის და პოლიციის ეკიპაჟები.
- ადგილობრივები ჰყვებიან, რომ გარდაცვლილები ერთმანეთის ახლო ნათესავები არიან. მოზარდები სოფელში არსებულ სამების ეკლესიაში წავიდნენ და იქიდან დაბრუნებულები ღამით, ეზოს სავალი ნაწილიდან გადავარდნენ.
“დიდი ტრაგედიაა. ვიცით, რომ ავტომანქანაში დეიდაშვილები და ასევე მათი ბიძაშვილები იმყოფებოდნენ, სულ 5 ახალგაზრდა.
გზიდან გადავარდნილა ავტომანქანა და აფეთქდა. ამბობენ რომ საჭესთან 14 წლის არასრულწლოვანი იჯდაო. ზოგმა მოასწრო გადმოსვლა, თუმცა სამი მათგანი დაიწვა.
გვიჭირს რამის თქმა, რადგან ისეთი ტრაგედია რომ იდენტიფიცირებაც გაუჭირდათ”, – ამბობენ ადგილობრივები.
მათივე თქმით, გარდაცვლილები არიან 2 ბიჭი (დეიდაშვილები) და მათი ბიძაშვილი გოგონა. Ambebi.ge-ს ინფორმაციით, გარდაცვლილები არიან საბა წნორიაშვილი, მერაბიკო სინჯიკაშვილი და მათი ბიძაშვილი გოგონა.
გურჯაანში დატრიალებულ ტრაგედიას გურჯაანის წმ. სამების საკათედრო ტაძარი ეხმაურება.
ჩვენი ტაძრის მრევლის სახელით, სამძიმარს ვუცხადებთ სოფ. მელაანში მომხდარ ავარიაში ტრაგიკულად გარდაცვლილი ახალგაზრდების (ორი ახალგაზრდა სტიქაროსანია) ოჯახებს, ახლობლებს, მეგობრებს, სოფელს და ჩვენს რაიონს. ღმერთმა დაუმკვიდროთ ცათა სასუფეველი სადაცა მართალნი განისვენებენ.
(საბა, მერაბი, გვანცა)
