"მოულოდნელად გავუბედურდი, საამაყო შვილი აღარ მყავს" - რუსთავში 24 წლის ბიჭს გლოვობენ
რუსთავის N3 საჯარო სკოლა სოციალურ ქსელში სამწუხარო ინფორმაციას ავრცელებს. გარდაიცვალა სკოლის კურსდამთავრებული 24 წლის ლუკა ვანიშვილი.
ახლობელბის ინფორმაციით, ლუკა მოულოდნელად გარდაიცვალა, სხვა დეტალები ამ დროისთვის უცნობია.
"გლოვობს მესამე სკოლა… მშვიდობით, ძვირფასო კურსდამთავრებულო… მესამე სკოლა შენით ყოველთვის იამაყებს. არის ამბები, რომელთა დაჯერებაც შეუძლებელია… არის ტკივილი, რომელსაც სიტყვები ვერ იტევს... დღეს ჩვენი სკოლის დიდი ტკივილი და მწუხარებაა ლუკა ის იყო იმ ახალგაზრდების სახე, რომლებითაც სკოლა ამაყობს. თავისი ცოდნით, შრომისმოყვარეობით, თავმდაბლობითა და ადამიანური ღირსებებით მან მასწავლებლებისა და თანაკლასელების გულებში განსაკუთრებული ადგილი დაიმკვიდრა. ჩვენ გვეამაყებოდა, რომ ჩვენი სკოლის მოსწავლე იყო. გვეამაყებოდა მისი წარმატებები, მისი მიღწევები, მისი მომავალი, რომელიც წინ იყო გადაშლილი… მომავალი, რომელსაც ამდენი იმედი და ოცნება ახლდა.
მაგრამ დღეს ამ ყველაფერზე ფიქრი აუტანლად მტკივნეულია… ძნელია, შეეგუო იმას, რომ ახალგაზრდა სიცოცხლე ასე მოულოდნელად წყდება; რომ ოცნებები, მიზნები და გეგმები შუა გზაზე რჩება; რომ ადამიანი, რომელსაც წინ მთელი ცხოვრება ჰქონდა, მხოლოდ მოგონებებში უნდა გააგრძელო… ჩვენი სკოლის კედლები კვლავ ინახავს იმ წლების მოგონებებს, როცა ის ჩვენთან იყო. მასწავლებლების მეხსიერებაში დარჩება მისი სახე, მისი ზრდილობა, მისი ადამიანური სითბო და ის სიამაყე, რომელსაც მისი წარმატებები გვანიჭებდა. ზოგიერთი ადამიანი ძალიან ადრე მიდის, მაგრამ მისი კვალი დიდხანს რჩება… დღეს ჩვენი სკოლა გლოვობს თავის კურსდამთავრებულს. ვიზიარებთ ოჯახის, ახლობლებისა და მეგობრების უდიდეს ტკივილს. ვუსამძიმრებთ ყველას, ვისთვისაც მისი დაკარგვა აუნაზღაურებელი ტრაგედიაა. ნათელში იყოს შენი სული, ლუკა ვანიშვილი შენ ჩვენი სკოლის ისტორიის, ჩვენი მოგონებებისა და ჩვენი გულების ნაწილად დარჩები" - ნათქვამია სამძირმის წერილში.
შვილის გარდაცვალების შესახებ, სოციალურ ქსელში ემოციურ პოსტს აქვეყნებს ლუკას დედა, მარი ჭამპურიძე.
"საუკეთესოთა შორის საუკეთესო ლუკა აღარ მყავს. ჩემი საამაყო შვილი, ოქროსმედალოსანი, ოქროს ბიჭი. მოულოდნელად გავუბედურდი, წამში. რა დღე დამიღამდა... 15 ოქტომბერი სამუდამოდ გამწარების დღე იყო. 24 წლის შვილი აღარ მყავს, სულ სიკეთეს რომ ასხივებდა ყველგან. სამუდამოდ გაშავდა ჩემი ცხოვრება," - წერს გარდაცვლილის დედა.
