2026 წლის იანვარ-აგვისტოში საპენსიო შენატანის განხორციელების ან ანაზღაურების ვალდებულების შეუსრულებლობის გამო დაკისრებული ჯარიმებიდან სახელმწიფო ბიუჯეტში 8 342 250 ლარი შევიდა.

ფინანსთა სამინისტროს სახელმწიფო ხაზინის ნაერთი ბიუჯეტის შემოსულობების, კონსოლიდირების გარეშე, მონაცემებით, მხოლოდ აგვისტოში არასწორად დარიცხული საპენსიო შენატანების გამო დამსაქმებლების მიერ ბიუჯეტში გადახდილმა თანხამ 1 589 090 ლარი შეადგინა.

2026 წლის პირველი 8 თვის მიხედვით, აღნიშნული თანხები თვეების მიხედვით ასე ნაწილდება:

• იანვარი — 513 305 ლარი;

• თებერვალი — 535 058 ლარი;

• მარტი — 504 777 ლარი;

• აპრილი — 457 397 ლარი;

• მაისი — 576 510 ლარი;

• ივნისი — 2 154 587 ლარი;

• ივლისი — 2 011 526 ლარი;

• აგვისტო — 1 589 090 ლარი.

აღსანიშნავია, რომ 2025 წლის იანვარ-აგვისტოში საპენსიო შენატანის ვალდებულების დარღვევისთვის დამსაქმებლების დაჯარიმებით ბიუჯეტში 1 546 688 ლარი შევიდა. მთლიანად 2025 წლის განმავლობაში კი ამ დარღვევებზე ბიუჯეტში 3 746 564 ლარი დაგროვდა.

გაზრდილი მაჩვენებელი 2025 წლის მაისში საპენსიო სისტემასთან დაკავშირებული რეგულაციების გამკაცრებას უკავშირდება. სწორედ ამ პერიოდიდან ამოქმედდა ცვლილებები „დაგროვებითი პენსიის შესახებ“ კანონში, რომლის შედეგადაც საპენსიო ფონდისა და შემოსავლების სამსახურის მონაცემთა ბაზები გაერთიანდა.

ცვლილებებმა საპენსიო ფონდს კომპანიების მიერ ვალდებულებების შესრულების მონიტორინგისა და დარღვევის შემთხვევაში დამსაქმებლების დაჯარიმების შესაძლებლობა მისცა.

რეგულაციების თავდაპირველი პირობებით, დარღვევის პირველ შემთხვევაში დამსაქმებლისთვის ჯარიმა 500 ლარს შეადგენდა, ხოლო იმავე წლის განმავლობაში განმეორებით დარღვევაზე — 1000 ლარს.

ამასთან, დაგროვებით პენსიებთან დაკავშირებით 16 სექტემბერს მიღებული საკანონმდებლო ცვლილებებით დამსაქმებლებისთვის აღნიშნული ჯარიმების ჩამოწერაა გათვალისწინებული. კერძოდ, 2025 წლის 1-ელი მაისის შემდეგ საპენსიო ფონდის მიერ დაკისრებული ჯარიმებისგან დამსაქმებლები გათავისუფლდებიან იმ შემთხვევაში, თუ არაუგვიანეს 2026 წლის 31 დეკემბრისა სრულად დაფარავენ საპენსიო შენატანებსა და საურავებს.

ამავე ცვლილებებით მცირდება სანქციის ოდენობაც — პირველ და განმეორებით დარღვევებზე 500 და 1000 ლარის ნაცვლად, ჯარიმა 300 ლარი იქნება.

საქართველოში დაგროვებითი საპენსიო სისტემა 2019 წლის 1-ელი იანვრიდან მოქმედებს. სისტემის ფარგლებში საპენსიო შენატანი დამსაქმებელს, დასაქმებულსა და სახელმწიფოს შორის ნაწილდება და ფორმალურ სექტორში დასაქმებულებისთვის შენატანის პრინციპი 2%+2%+2%-ია.